By Landscope Pill, on December 16th, 2010
****************
चितवनको टाइगर टप्समा शनिबार राति के भयो, त्यो कि पारसलाई थाहा छ कि रुबेललाई। गोली भने चलेकै हो र पारसले नै त्यसलाई चलाएको हो भनेर स्वयं पारसले स्वीकार गरिसकेका थिए। परिस्थिति कस्तो थियो गोली चल्दा त्यो छानबिनको विषय बनेको छ। घटना विवरण पछि बुझ्दै जाँदा मिडियामा आएको जस्तो नभएको प्रष्ट भएको छ। दुई जँड्याहाको बीचमा खै कुन्नि के विषयमा विवाद हुँदा रुबेलले सासुको पावर लगाएर पारसलाई सबक सिकाउन खोजेको चाहिँ अहिलेसम्मको घटना विवरणले बुझिएको छ। रुबेलले पावरको मिसयुज गरेर फ्याँकेको तीर अब बुमर्याङ भएर अर्थात् घुमेर रुबेलतिरै फर्कने निश्चित भइसकेको छ। अब घटनाले लहरो तान्दा पहरो गर्जँदै गएपछि पारस र रुबेल दुवैले बयान फेरेर जनतालाई उल्लु बनाएका छन्। पारस आज धरौटीमा रिहा हुने भएका छन्। उनले प्रहरीसँगको बयानमा आफूसँग हतियार नि नभएको र गोली पनि नचलाएको बताएका छन् र घटनास्थलमा गोलीको खोका पनि छानबिन टोलीले भेट्टाउन सकेको छैन। रुबेलले पनि पारससित हतियार नदेखेको बयान दिएका छन्।
अनि हतियार पनि छैन, देख्या पनि छैन, पड्काएको पनि छैन भने यत्रो गर्न हल्ला गर्या त तिमेरुले, यत्रो गर्न मिडियाबाजी गर्या त? तर जे होस्, तीन दिन पारस प्रहरी हिरासतमा रहने राजपरिवारका पहिलो सदस्य बने, त्यसैलाई गणतन्त्र आएको महसूस गराएको मानौँ। तर अब नवयुवराज बन्न खोज्ने रुबेल पनि बच्न सक्ने स्थितिमा छैनन्। उनका अवैध धन्दा र कारोबार बारे नेपाली मिडियाले खेदेको खेद्यै छन्। अबका केही दिनमा कि रुबेल विदेश भाग्यो भन्ने समाचार सुन्नु पर्छ, कि त प्रहरीले गिरफ्तार गर्यो भन्ने सुन्न पाइन्छ- एक साथी अघि यसरी नै ठोकुवा गर्दै थिए।
रुबेलको कर्तुत बारे एभिन्युज टेलिभिजनका संवाददाता दीपक खरेलले तयार पारेको एउटा रिपोर्ट-
पासपोर्ट नं. ए ०१६०२४४ वाहक बंगलादेशी नागरिक रुबेल चौधरी जुन ७, २०१० बाट रिलेसन भिसामा नेपाल बस्दै आएका छन्। र, यो चौधरीको नेपाल बसाई पहिलो होइन। यस अघि पनि धेरै पटक रुबेल चौधरी नेपाल आएका छन् र लामो समय बसेर फर्किने गरेका छन्। परराष्ट्रमन्त्री एवम् उपप्रधानमन्त्री सुजाता कोइरालाको ज्वाईं भए यता रुबेलको सक्रियता बढेको घटनाक्रमले स्पष्ट पार्छन्।
बंगलादेशको ढाका स्थायी बसोबास भए पनि रुबेल चौधरी फिलिपिन्स र मलेसियामा बस्ने गरेका थिए। विशेष गरी अवैध भीओआईपी कल बाइपास मुख्य व्यवसाय भएका रुबेलको सञ्जाल कोइराला परिवारको ज्वाईँ भएयता बढेको हो। नेपाल अघि चौधरी, फिलिपिन्स, मलेसिया र बंगलादेशबाट भीओआईपी कल बाइपासको व्यवसाय गर्दै आएका थिए।
२०६६ साल साउन २७ गते महानगरीय प्रहरी परिसर हनुमानढोकाको विशेष टोलीले खुमलटारस्थित एक घरमा छापा मार्यो जहाँबाट तीनजना बंगलादेशी नागरिक र करोडौं मूल्य बराबरको भीओआईपी कल बाइपास गर्ने सामग्री बरामद भए। र, सँगै हजारौं थान एनटीसी कलका सिमकार्डहरु। पक्राउ परेका असेफ फुजमन, निसार अहमद र मुग्धिर हुसैनलाई बंगलादेशबाट कामका लागि नेपाल ल्याइएको थियो। घटनाको छानबिन गरिरहेको टोलीले जब यस घटनामा रुबेल चौधरीको संलग्नता देख्यो, वरिष्ठ प्रहरी नै इभिडेन्स नभएको भन्दै खुट्टा तान्न बाध्य भए। अन्यथा हजारौं हजार सिम कसका नाममा कसले निकाल्यो त्यो जानकारी पाउनु कठिन विषय होइन।
कल बाइपासको घटना सेलाउन नपाउँदै बंगलादेशी नागरिक नेपाली पासपोर्टसहित पक्राउ पर्न थाले। अपराध महाशाखाको टोलीले साउन १८ गते चार जना बंगलादेशी नागरिकलाई नेपाली पासपोर्ट सहित पक्राउ गर्यो। पक्राउ परेका रमजान अली, महमद सकिल, अहमद फारुक अहमद र सरिफ मध्य फारुक अहमद दर्जनौं पटक नेपाल हुँदै चीन, भारत, मलेसिया र फिलिपिन्स पुगेको उनको पासपोर्टमा भएका भिसाहरुले स्पष्ट पार्छन्। यसरी बंगलादेशी नागरिकको गिरफ्तारी त्यो पनि नेपाली पासपोर्टसहित नौलो विषय थियो। तर यस घटनाको थप अनुसन्धान के भयो अझै प्रहरीले खुलाउन सकेको छैन। प्रहरीको वरिष्ठ स्रोत यी घटनाका मुख्य नाइके रुबेल चौधरी भएकोमा कुनै शंका नरहेको बताउँछ तर कारबाही गर्दा सासु परराष्ट्र मन्त्री तथा उपप्रधानमन्त्री सुजाता कोइरालासम्म उनको पहुँच बाधक भएकोमा कुनै शंका रहेन।
संयोग होइन, बंगलादेशी रुबेल चौधरी हाइ क्लासका ब्रोकर र कल बाइपासका गड फादर हुन्। यही सही मौका रुबेलको गिरफ्तारीका लागि।
भिडियो हेर्नुस्-
No comments:
Post a Comment